علمتني الدنيا - فايزة احمد
علمتني الدنيا ما ابكيش ع اللى راح
وأن بكيت لحظة أقول ليه ابكي ليه
د الأمل دنيا قصاد عيني براح
والحياة قدامنا بتشاور عليه
واتفقت معاك يا قلبي نحب تاني
بعد ما ودعنا جرح الأولاني
بس ليه يا قلبي مش قادرين نحب
خطوتي بتحوشني كل ما اقول احب
وألاقي الخوف زرع غابة من الاوهام
اخاف أمشى لتوه تاني مع الأيام
وارجع وابص شمال ويمين
والاقي كل الناس حلوين
وارق من فجر الياسمين
بس اللى قلبه على مين
بقولك ايه يا قلبي ما كفاية خوف وحيرة
عايزين بقى نرتاح
انا علمتني الدنيا احب واعيش لبكرة
وانسى اليوم اللي راح
ايامي بتعاتبني ساعات وتقولي ليه العذاب ده
جرح السنين خد زمنه وفات نفتكره ليه النهارده
أقول صحيح يا قلبي الماضي دا كان له حكاية
مشواره كان مقدر وانت مشيته ووايا
وكأي طريق في الدنيا يا قلبي
كان له بداية ونهاية
انا مره تهت فى بحر الشوق
والحب كان غالي عليا
لما ندهت وقلت يا شوق
ما لقتش جنبي مراكبية
هو عشان مرة حبينا
والموج ما كنش قلبه علينا
نعادي الحب وحلاوته
واقول توبة توبة توبة ما نقدرش
ونخاف ونهرب من سيرته
ونقول توبه توبة توبة ما بيحصلش
الحب عمره ما كان قاسي
القسوه في القلب الغدار
ياما ناس بتعشق وتقاسي
وما فيش حلاوه من غير نار
وارجع وابص شمال ويمين
الاقي كل الناس حلوين
وارق من فجر الياسمين
بس اللي قلبه عليا مين
بقولك ايه يا قلبي ما كفاية خوف وحيرة
عايزين بقى نرتاح
انا علمتني الدنيا احب واعيش لبكرة
وانسى اليوم اللي راح
وقابلت الحب وشفت الحب
وخدنى معاه على رحله جميلة جميلة
فرحه وكان قلبي بيستناها
ومحروم منها ليالى طويلة طويلة
شال السحاب من سكتي وفتحلي باب بكرة
طليت عليك من وحدتي يا حبيب أمل بكرة
وقلت لك اهلاً .. يا دنيتى اهلاً
يا فرحتى اهلاً .. فى عينيا دول اهلاً
ده الحب عمره ما شاف زيك حبيب ابداً
وارتحتلك والحب اداني
أمل وعطف وشوق وأماني
من لهفتي وفرحة حرماني
كنت اما تغيب عن عيني ثواني
الدنيا بحالها الاقيها واحشاني
ياما ليالي من كتر شوقي
كانت تروح بدري علشاني
علشان اصحي الشمس واخدها
واروح معاها احبك تاني
وابص في قلبي من وسط النعيم
الاقي صوت الحب القديم
يفكرني بسنين مرت
واخاف منك لتجرحني
واخاف أندم كمان مرة
وأقول يا حب سامحني
وارجع وابص شمال ويمين
الاقى كل الناس حلوين
وارق من فجر الياسمين
بس اللى قلبه على مين
بقولك ايه يا قلبي ما كفاية خوف وحيرة
عايزين بقى نرتاح
انا علمتني الدنيا احب واعيش لبكرة
وانسى اليوم اللي راح
انا علمتني الدنيا علمتنى الدنيا
كلمات: حسين السيد
الحان: محمد سلطان