لما يقابلك اول مرة - صباح
لما يقابلك اول مرة
اسمعي منه و لا ترديش
خلي عقلك في عينيه يقرا
و اشتري منه و لا تبيعيش
و ان حسيتي عشر ة المية
ان كلامه جد شوية
اختبريه و بصيله وامتحنيه و قوليله
انا شايفة عندك افكار
و الافكار يعني اسرار
و الاسرار جوة سراديب
و السراديب فيها دواليب
و الدواليب عايزة نجار
و النجار عايز منشار
و المنشار طبعه حامي
يفتح قلبك قدامي
و انا قلبي أصله خواف
و الخواف من الهوى بيخاف
و تروحي باصة جوا عينيه
شوفي حيبان على وشه ايه
ان كان تعلب حيروح ماشي
و تروحي كاسرة قلة وراه
و ان كان مخلص حيقول ليلى
و انتي تقولي وقيساه
تاني مرة لما يقابلك
مهما يبان الحب عليه
خليه يضحك هو قبلك
شوفي الضحكة لونها ايه
و ان حسيتي خمسين المية
ان كلامه جد شوية
اختبريه و بصيله و امتحنيه و قوليله
لك نظرة عاشق هيمان
و الهيمان يعني عيان
و العيان عايز دكتور
و الدكتور في عاشر دور
و الدور العاشر عالي
و العالي دايما غالي
و الغالي عايز يرتاح
و الراحة عايزة مفتاح
و المفتاح شايله اخويا
روح قوله يشاور ابويا
و تروحي باصة جوا عينيه
شوفي حيبان على وشه ايه
ان كان تعلب حيروح ماشي
و تروحي كاسرة قلة وراه
و ان كان مخلص حيقول ليلى
و انتي تقولي وا قيساه
تالت مرة ان قال يا حبيبتي
انتي حياتي و انتي و انتي
ردي و قولي و انت كمان
انا حبيتك حب جنان
و ان حسيتي بعد شوية
ان كلامه مية المية
اختبريه و بصيله و امتحنيه و قوليله
انا عايزة منك برهان
و البرهان يلزمله ضمان
و الضامن عند المأذون
و المأذون عايز عربون
و العربون عايز فكة
و الفكة تجيب الشبكة
و الشبكة تلمع و تبان
و تلعلط فوق الفستان
و الفستان عايز طرحة
و الطرحة يعني فرحة
و تروحي باصة جوا عينيه
شوفي حيبان على وشه ايه
ان كان تعلب حيروح ماشي
و تروحي كاسرة قلة وراه
و ان كان مخلص حيقول ليلى
و انتي تقولي و زوجاه