لا يا روح قلبي - فايزة احمد
لا يا روح قلبي .. قلبي أنا
مش أنا اللي أحب و انسى .. مش أنا
ابعد أنت .. و مهما حيكون الألم
مش حافكر فيك بلوعة أو ندم
الليالي .. اللي عاشها الحب وياك ملكي وحدي
مهما تبعد مش حتاخد ليلة واحدة من اللي عندي
لا يا روح قلبي أنا .. مش أنا اللي أحب و انسى
مش أنا …
يصعب عليا .. انسى رحلة عمري كله معاك
يصعب عليا .. لما تيجي سيرتك و اقول حانساك
لكن انسى ليه .. أنا حانسى أيه
من قبل حبك أنا كنت أيه .. كانت حياتي أنا فيها أيه
فراغ ووحدة و شوق سهران .. و شموع تونسها جدران
لا حب فيها و لا حرمان
من النهاردة حاعيش لأجمل حلم شفته
و حافتكر بدموع أحلى عمر عشته
حبيبي .. ياللي جاي النهاردة بتقول حتنسى عهدك معايا
و عايزني زيك بكلمة واحدة .. أكتب بإيدي سطر النهاية
علمتني أحبك .. و فتحتلي قلبك
علمتني الدنيا .. حبتها و أنا جنبك
علمتني أسهر .. على شوق ما يتقدر
و استنى لتاني يوم .. عشان يفوت و اسهر
علمتني اني أحب و بس .. و نسيت تعلمني أزاي انسى
أنا من النهارده بحب و بس .. مهما جرى مش حاعرف انسى
ياما قلتلك يا شوق .. ننسى العذاب و نتوب
و ازاي نتوب عن شيء .. فوق الجبين مكتوب
مكتوب .. يا قلبي
فكرت آني أسألك .. أيه يا حبيبي غيرك
يمكن سؤالي ده الي صورة الماضي تيجي تفكرك
فاكر .. فرحة عيونك بيا و انت بتبتسم
و الشمس لما جنب منها تترسم
فاكر .. لهفة حنانك بعد يوم واحد سفر
و أنا زي ليل عطشان بيستني القمر
فاكر ..
رقة عتابك .. حتى في ساعة الغضب
كانت نغم .. فضة على أوتار من دهب
و رجعت أقول أنا حسأل ليه .. ما خلاص عرفت نويت على ايه
و القلب لما النار تكويه .. و تهد أجمل حاجة فيه
يمكن ساعات يندم و ساعات .. حتى الندم ميهونش عليه
ياما قلتلك يا شوق .. ننسى العذاب و نتوب
و ازاي نتوب عن شيء .. فوق الجبين مكتوب
مكتوب .. يا قلبي
الليالي .. اللي عاشها الحب وياك ملكي وحدي
مهما تبعد مش حتاخد ليلة واحدة من اللي عندي
لا يا روح قلبي أنا .. مش أنا اللي أحب و انسى
مش انا ........
كلمات: حسين السيد
آخر ما لحن الموسيقار رياض السنباطي
كلمات: حسين السيد
آخر ما لحن الموسيقار رياض السنباطي