نقطة الضعف - فايزة احمد
غصب عني يا حبيبي مهما اقول ح ابعد واخبي
بلقى روحي بحنلك واشتاق لحبي .. غصب عني
غصب عني كمان بصدق حسن ظني
واطوي شكي فيك وحيرتي في التمني
واعمل ايه وياك أنا وحبك اقوى مني
قد ما ارادتي قويه قد ما دموعي ابية
نقطه الضعف اللي فيَّا
هي قلبي وانت قلبي
هي قلبي وانت قلبي
اشتياقي يا حياتي وانت غايب
اشتياق فوق اشتياق كل الحبايب
بس عزة نفسى بتخليني اداري
واقدر اصبر وابتسم فى عز ناري
يجرى ما يجرى وما حدش عنده فكرة
والحقيقة اني بدوب لهفة وحنين
وانتظار على نار وافكار حيرانين
بتغالبنى الوحدة وانا مع ناس كتار
ويصاحبني السهد حتى بالنهار
والدقيقة تمر عليَّا سنين
كل ده وانت بعيد
واما بتعود من جديد .. كل ثانيه تبقى عيد
والحياة بترد فيَّا والسماح يغلب عليَّا
قد ما ارادتى قويه قد ما دموعى أبية
نقطة الضعف اللي فيَّا هي قلبي وانت قلبي
نقطة الضعف اللي فيَّا عذبتني
حملتني فوق ما يقدر حد يتحمل ضنى
وصلتنى اعيشلك انت وانسى حتى مين انا
وامشي ورا قلبي وغرامه فى الضلوع
زي طيران الفراشة ع الشموع
بعرف اني ح اروح وما اعرفش الرجوع
عايز اكتر من كده ايه
عايز اكتر من كده كده ايه يا منايَا
انت ما شفت الحب ده الا معايَا
ليه ما بتقدرش ليه وانا من البداية
بحبك حب لسه ما تعرفش
واخاف ع الحب مين حب ومخافش
يا حبيبى ..يا حبيبى
زي ما بخاف اللي تاهت نفسه منه بخاف عليك
واعمل ايه اعمل ايه
اعمل ايه لما عواطفى بتعاندني وبتراضيك
واعمل ايه وانا سر ضعفى رأفة بيك
من حبي فيك ياحبيبي نقطة الضعف اللي عندي
كان منايَا تبقى عندك
واللي بشعر بيه لوحدي
انت تشعر بيه لوحدك
كان منايا يا منايا يغيرك عطفي وحناني
كان منايا تبقى ارحم ما بزماني
بس يا خسارة التمني عاش تمني
والحياة ما بتديناش كل الاماني
قد ما ارادتى قويه اد ما دموعي ابية
نقطة الضعف اللي فيَّا هي قلبى وانت قلبي
كلمات: عبدالوهاب محمد
ألحان: محمد سلطان