اعلان

حاول تفتكرني - عبد الحليم حافظ

انا اللى طول عمرى بصدق
كلام الصبر في المواويل
وانا اللى طول عمرى بقول 
الحب عمره طويل



من كتر ما كان الحب واخدنا 
وكل حلاوه الدنيا في ايدنا
لا فكرنا الزمان يعاندنا 
ولا الايام تقدر تبعدنا
وعشنا الحب بالايام 
وكل بكره فيه أحلام
واتاري كل ده اوهام 

وسافر من غير وداع 
فات في قلبي جراحه 
دبت في ليل السهر 
والعيون ما ارتاحوا 
و منين نجيب الصبر يا اهل الله يداوينا 
اللي انكوى بالحب قبلينا يقول لينا
وسافر من غير وداع .. 

حبيبي .. والله لسه حبيبي 
والله وحبيبي مهما تنسى حبيبي
والله وحبيبي عمري ما انسى حبيبي
ابقى افتكرني .. حاول تفتكرني

بعدنا بعدنا ليه .. تعبنا .. قول قول من ايه
من الشك يا عينيا .. من كلمه قالوها عليا
من الغيره يا عينيا .. الغيره ياما عملت فيا
حبيبى... مهما شوقى يطول يا حبيبي
ح أفضل اقول يا حبيبىي

ابقى افتكرني .. حاول تفتكرني
ولو مريت في طريق مشينا مره فيه 
أو عديت في مكان كان لينا ذكرى فيه
ابقى افتكرني .. حاول تفتكرني
دي ليالي عشناها .. ابداً مش حنساها
على بالي يا حبيبي .. على بالي ايام وليالي
على بالي ليل ونهار .. وانت على بالي
ومنين نجيب الصبر يا اهل الله يداوينا 
اللي انكوى بالحب قبلينا يقول لينا
وسافر من غير وداع ...

من الليالي الليالي من بعدك واللى جراللي
سهرنى الشوق دوقني الشوق 
طعم الحرمان في الليالي
ياما ايام ضاعت يا سلام 
في عذاب وآلام سهران ما بنام
قضيت الليل مع قمر الليل 
ونجوم الليل نحكي في كلام
ياما قلت عنك وغلبت شكوى منك 
وحياه الغالى عندك
ابقى افتكرني .. حاول تفتكرني
ولو مريت في طريق مشينا مره فيه
أو عديت في مكان كان لينا ذكرى فيه
ابقى افتكرني .. حاول تفتكرني

تعالى .. تعالى
خلي الشمس مع ابتسامتنا تطلع وتنور دنيتنا
تعالى .. تعالى
ليه نقول ان الفراق مكتوب علينا والحياه قدامنا
ليه نسلم نفسنا لليأس 
ونقول انظلمنا .. ليه نقول انظلمنا
تعالى .. تعالى
خلي الدنيا تشوف فرحتنا 
خلي الدنيا تقول حكايتنا
تعالى .. تعالى
ياللي وانت بعيد معايا 
نفسي يوم تسمع ندايا
وان ما قدرتش تيجي تاني 
ونسيت زماني ونسيت مكاني
ابقى افتكرني .. حاول تفتكرني



كلمات: محمد حمزة
ألحان: بليغ حمدي

Share this

شاركشارك