عدى النهار - عبد الحليم حافظ

عدّى النهار .. و المغربية جايّة تتخفّى ورا ضهر الشجر

و عشان نتوه في السكة .. شالِت من ليالينا القمر

و بلدنا ع الترعة بتغسل شعرها .. جانا نهار ما قدرش يدفع مهرها

يا هل ترى الليل الحزين .. أبو النجوم الدبلانين

أبو الغناوي المجروحين .. يقدر ينسّيها الصباح

أبو شمس بترش الحنين

أبداً .. بلدنا للنهار .. بتحب موّال النهار

لما يعدّي في الدروب .. و يغنّي قدّام كل دار

و الليل يلف ورا السواقي .. زي ما يلف الزمان

و على النغم .. تحلم بلدنا بالسنابل والكيزان

تحلم ببكرة .. و اللي حيجيبه معاه

تنده عليه في الضلمة .. و بتسمع نداه

تصحاله من قبل الأدان .. تروح تقابله في الغيطان

في المصانع والمعامل و المدارس والساحات

طالعاله الصحبة صفوف .. جنود

طالعاله رجال .. أطفال .. بنات

كل الدروب .. واخدة بلدنا للنهار

و احنا بلدنا للنهار .. بتحب موال النهار

لما يعدي في الدروب .. و يغني قدّام كل دار

كلمات: عبد الرحمن الابنودي
الحان: بليغ حمدي

اغاني زمان