وقدرت تهجر - فايزة احمد
وقدرت تهجر يا قلبك .. وقدرت تصبر يا بختك
ونسيت حياتي وسنين حياتي .. وقدرت تهرب من ذكرياتي
روحي انا ليه بس انا .. ما قدرتش انسى يوم ولا ساعة هنا
وبيلوموني ويقولولي ليه .. ليه معملش زيك
وانسى حُبك ليه .. هو اللى حَبك وشاف حلاوتك
حينسى ايه بس ولا ايه ؟!
اللي بيلوموا عليا ويقولولي انسى حُبك
يعرفوا ايه عن حياتي اللي دابت حُب جنبك
ايامي كانت لها الف معنى دنيا ومرسومه احلام
مكانتش دنيا دى كانت جنه والحب كان هو الرسام
كنت اشوف الورد بيفتح بحُب بين ايديا
كنت اقول عالشمس بتروح تحب فى دنيا تانيه
كانوا كل الناس عرايس لابسه حُب ورايحه جايه
كان ساعات الود ودي من هَنا الحُب اللى فيا
عايزه افرق منه للدنيا علشان ده كتير عليا
اللي حَبوا قدروا ينسوا ازاي وليه
ده انت غايب بس حبك ليل نهار بتغنى بيه
واللي يهوى الحلو لازم يرضى بالمُر اللى فيه
انساك ازاي .. ازاي انساك ازاي انساك ازاي
ده انا لو قلبي ينساك العين مابتخبيش
وعينيا لو تنساك الفكر ما يسيبنيش
والفكر لو ينساك الشوق ما يطاوعنيش
والشوق لو كان يطاوعني حُبك ما يرحمنيش
ياحبيبي انا مُش بأيدي انسى حبك ياحبيبي مُش بإيدي
ياما قولت انساك والاقى الصبر بيقول مُش بإيدي يا حبيبي
ساعات ساعات ساعات بياخدني الفكر واروح لبعيد
واخاف اخاف اخاف ليكون في حياتك حب جديد
وانا اخاف ليه .. واخاف من ايه ده احنا حبينا
والشوق ياما عمل الشوق فينا .. ياما ياما ياما عمل الشوق فينا
كلمة يا حبيبي اقولهالك .. كانت تملى الدنيا علينا
همسة يا حياتي تقولهالي .. كانوا العشاق يحلفوا بينا
كل ده افتكره واقول راجع راجع حبيبي راجع
وح ترجع تاني ليالينا ح ترجع تاني
تعالى تعالى اسمع يوم دقة قلبي
وهي بتقولك انا عايزاك
كلمات: حسين السيد
ألحان: محمد عبد الوهاب